જત જણાવાનું તને, તારા નશામાં હોઉં છું

જત જણાવાનું તને, તારા નશામાં હોઉં છું,
શું લખું, શું કહું તને, હું કયાં કશામાં હોઉં છું!

પાત્ર ખાલી કે છલકતું હો ફરક પડતો નથી,
જે દશામાં હોઉં છું હું એ દશામાં હોઉં છું.

સ્થળસમય કયારેક તો પથરાય તારા પંથમાં,
દૂર કે નજદીક હું એક જ દિશામાં હોઉં છું.

તગતગું તડકો થઇ તારા બધા દિવસો મહીં,
અંધકારે મઘમધ્યો તારી નિશામાં હોઉં છું.

તું કહે, કયારે નથી હોતો હું તારા શ્વાસમાં,
આમ જો કે હું હંમેશાં કહેકશાઁમાં હોઉં છું!